Albert Svan (AlbertSvan)

Ég heiti Albert Svan (kt. 311068-5719) og er sonur þeirra Sigga og Sillý úr Reykjanesbæ. Ég fæddist á hrekkjavökunni árið 1968 og ólst upp í Keflavík. Gekk síðan í háskóla í Reykjavík og lauk námi í Helsinki í Finnlandi. Ég hef alið upp tvö börn; Thomas Albertsson sem fæddist 1996 og Ceciliu Albertsdóttir fæddri árið 1998. Ég bý í Ytri Njarðvíkurhluta Reykjanesbæjar með syninum og þrem köttum.

Stefnumálin
Ég styð heilshugar við grunnstefnu Pírata og önnur stefnumál flokksins. Ég hef tekið virkan þátt í stefnumótunarferli Pírata síðasta árið. Þar sem ég hef lagt sérstakan áhuga á frelsi einstaklinga og langtímastefnumótun. Mér finnst sérstaklega ánægjulegt að stefnt verði að gjaldfrjálsri heilbrigðisþjónustu, að stutt verði við fyrirbyggjandi lýðheilsu úrræði og að hugmyndafræði borgaralauna svífi yfir vötnum í ýmsum stefnum Pírata.

Ég hef einnig sýnt auðlinda- og umhverfismálum mikinn áhuga, enda eru það málaflokkar sem krefjast langtímastefnumótunar. Til viðbótar þessu hef ég tekið þátt í umræðu pírata um byggðastefnu, efnahagsmál, ferðamál, höfundaréttarmál, landbúnaðarmál, sjávarútvegsmál og úrbætur í störfum Alþingis.

Í anda efnahagsstefnu Pírata og grunnstefnunnar hef ég mikinn hug á að skilgreind verði betur hver grunnþjónusta ríkisins er við fólkið í landsinu og hvaða samfélagsstoðir sveitarfélögum ber að viðhalda. Þegar skilgreining liggur fyrir þarf að stefna markvisst að því að tekjur og útgjöld hins opinbera miðist við að viðhalda þessum stoðum og þjónustu til lengri tíma.

Ég skráði mig í Pírata í apríl 2014 og var valinn í stjórn Pírata í Reykjanesbæ ári síðar og hef verið ritari Pírata á Suðurnesjum síðasta árið og bætti við mig starfi ritara Framkvæmdaráðs Pírata eftir að tölvan valdi mig í það með slembivali.

Suðurkjördæmi
Til viðbótar við stefnumál Pírata almennt hef ég mikið velt fyrir mér málefnum Suðurkjördæmis þar sem atvinnulíf sjávarbyggða og ferðamannastrauma mætast í stórbrotnu umhverfi. Það hefur sýnt sig að stærri fyrirtæki svífast oft einskins til að auka arðsemi en eru ekki að sama skapi að axla samfélagslega ábyrgð og það eru mörg dæmi um skoðanakúgun, sér í lagi í smærri bæjarfélögum. Þessu þarf að linna og til þess má nota tól bæði úr hægri og vinstri hluta verkfærakistunnar. Ég er á þeirri skoðun að valdefla þurfi einstaklinga og frelsi þeirra til atvinnusköpunar auk þess að skoða gjaldtöku af arðgreiðslum til að sporna gegn einokun og óeðlilegri fákeppni.

Suðurkjördæmi er ein helsta matarkista þjóðarinnar bæði á landi og sjó. Með því að stefna að borgaralaunakerfi getum við í framtíðinni stutt í auknum mæli við grunnþarfir einstaklinga sem vinna í matvælaiðnaði, hvort sem það er fiskiðnaður eða landbúnaður og bætt þannig hag fólks í þessum atvinnugreinum og öðrum tengdum þeim. Handfæraveiðar eiga að vera undanþegnar kvóta eins og sjávarútvegsstefnu Pírata gerir ráð fyrir og allur landaður fiskur þarf að fara á markað til að jafna tækifæri matvælafyrirtækja.

Þjóðgarður á miðhálendi Íslands verður mikilvæg stoð fyrir Suðurkjördæmið, enda telst um 45% af kjördæminu til miðhálendis. Víða erlendis eru þjóðgarðar arðbær landnotkun, sér í lagi þar sem ferðamannastraumur er mikill eins og á Íslandi. Ferðamálastefna Pírata felur í sér að stutt verði markvisst við að fjárhagslegur ávinningur af ferðaþjónustu skili sér til nærsamfélaga, þ.e. þeirra sveitarfélaga sem heimsótt eru og að gistináttagjald renni til þeirra sveitarfélaga sem gist er í. Þetta eru góðar hugmyndir fyrir suðurkjördæmi með sem inniheldur aðgengilegustu náttúruperlur og vonandi fljótlega með miðhálendisþjóðgarð líka. Í framhaldi að hálendisþjógarði hef ég áhuga á að skoða þjóðgarð á Reykjanesi sem framhald af uppbyggingu jarðvangs þar.

Nám og störf
Ég gekk í barnaskóla, gagnfræðaskóla og fjölbrautaskóla í Keflavík. Með skóla vann ég í fiskverkunum allt frá 12 ára aldri, utan eitt sumar sem ég vann hjá Aðalverktökum á svæði hersins Keflavíkurflugvelli. Eftir stúdentspróf vann ég í eitt ár hjá húsnæðisdeild bandaríska hersins og í hálft ár hjá fiskeldisfyrirtækinu Silfurlax úti á Reykjanesi.

Árið 1990 skráði ég mig í Háskóla Íslands og lærði við jarð- og landfræðideildina til 1992. Þá flutti ég til Finnlands og lauk MSc gráðu í umhverfis- og landfræðum árið 1996. Ég starfaði við rannsóknir hjá Umhverfisstofnun Finnlands frá 1996-1999, sem sérfræðingur og upplýsingafulltrúi hjá Hollustuvernd ríkisins 1999-2003 og hjá Umhverfisstofnun 2003-2006. Síðla árs 2006 söðlaði ég um og vann við farsímahugbúnaðarprófanir í Tampere í Finnlandi allt til ársins 2012. Þá hóf ég störf hjá Hagstofu Íslands og sé vinn að sjávarútvegstölfræði og umhverfistölfræði.

Framtíðin
Ég er tilbúinn að taka að mér eitt af efstu sætum á lista Pírata í Suðurkjördæmi. Hvar sem ég lendi mun ég vinna áfram í samræmi við gildi og stefnur Pírata. Ég er öruggur á því að stefnumál Pírata eru almennt vel til þess fallin að efla samfélag og framþróun atvinnumála í Suðurkjördæmi sem og landinu öllu.