Árni Steingrímur Sigurðsson (Beltiras)

Ég er 46 ára Reykvíkingur með fjölbreytta starfsreynslu. Ég vinn við forritun hjá Mentis Cura en við erum að vinna að greiningarforriti sem les heilalínurit og spáir fyrir um þróun á Alzheimer. Ég er giftur Pálínu Ásgeirsdóttur sálfræðingi og saman eigum við einn son. Á heimilinu eru líka tvö börn hennar af fyrra hjónabandi og maki annars þeirra.

Framan af aldri vann ég ýmis konar störf. Ég hef flokkað málma á ruslahaug, grafið upp götur til að skipta um skólplagnir, unnið rannsóknarstörf, við sandblástur, bílamálun og réttingar, lagerstörf, tölvuinnslátt, sendils og vaktmannsstörf á Landspítala ásamt eflaust einhverjum sem ég er að gleyma.

Ég hef upplifað á eigin skinni hvað það getur verið erfitt að neita sínum nánustu um einföld lífsgæði vegna þess að endar ná einfaldlega ekki saman og finnst það mikilvægasta verkefni stjórnmálamanna að finna leið til að auð landsins sé ekki eins misskipt og nú er. Það er ekki nóg að ég hafi náð að “meika það”, ég vil að fleiri fái tækifæri til að hafa það aðeins betra.

Við erum með frábæra stefnu í mörgum málaflokkum sem ég get kvittað undir nánast athugasemdalaust. Það er eitt mál sem skiptir mestu máli fyrir lýðræðissinnaða Íslendinga í dag og það er að Stjórnarskrármálið. Mikilvægt er að frumvarp Stjórnlagaráðs komist eins óbreytt í gegn um þingið og hægt er. Við sáum það á yfirstandandi kjörtímabili hversu auðvelt það er að missa þann árangur sem þó náðist í gegnsæi og stjórnarháttum sem náð var kjörtímabilinu á undan. Það vantar aðgengi þegnanna að stjórnvaldsákvörðunum þannig að þjóðin geti kallað eftir þeim breytingum sem þarf að gera á kerfinu þannig að lifandi sé í landinu. Lýðræðið á nefnilega að snúast um allt sem gerist á milli kosninga og kosningar eiga bara að vera froðan á öldunni. Með nýju stjórnarskránni hefur þjóðin færi á að gefa stjórnvöldum aðhald milli kosninga.

Ég var spurður á fundi frambjóðanda í fyrra af hverju ég ætti að ráða. Ég svaraði því til að ég vilji ekki ráða, ég vilji þjóna. Píratar eru nefnilega þannig uppbyggðir að grasrótin er sterkari en þeir sem veljast til trúnaðarstarfa. Ég vil þjóna þeirri hreyfingu.

Vegna kosningar í stjórn PíR laugardaginn 13. janúar 2018:

Ég hef setið sem varamaður í stjórn PíR og var fulltrúi í Upplýsingaráði fyrir hönd PíR. Ég er talsmaður þess að við lögum það einhvern vegin að varaþingmenn geti tekið þátt í flokksstarfinu. Mér finnst það bara ekki ganga upp að varaþingmenn séu útilokaðir frá stjórnarsetu aðildarfélaga. Þetta eru einstaklingar sem eru klárlega mikilsvirtir í félaginu hafandi náð hátt í prófkjöri, verða að teljast duglegir einstaklingar og líklegir til að vinna störf sín vel fyrir flokkinn. Það þarf að breyta lögum félagsins, annað er svolítið skot í fótinn.