Elsa Nore (ElsaN)


Elsa heiti ég, 39 ára, sænsk að uppruna og leikskólakennari að mennt. Fyrrverandi fósturbarn og pönkari í sál og hjarta, þó hárið sé ekki lengur litað eða sett upp í hanakamb. Og fötin ekki neitt rosalega rifin heldur…

Ég bý í leiguhúsnæði í vesturbæ Reykjavíkur og á 14 ára son sem er hjá mér aðra hverja viku.

Þessa stundina vinn ég sem leikskólakennari í fullu starfi og meðfram því stunda ég aukastarf á Hrafnistu í 26% stöðu.

Áður hef ég unnið við ýmis störf sem tengjast dýrum, bæði á bóndabæjum og í Húsdýragarðinum. Ég hef einnig unnið við afgreiðslu í búð og við ræstingar á gistiheimili. Frá því ég var unglingur hefur leikskólastarfið heillað mig og ég var leiðbeinandi á leikskóla í rúm fimm ár, fyrst í Svíþjóð og svo hérlendis, áður en ég sótti um í Kennaraháskólanum.

Ég hef ekki alltaf verið virk í pólitík en hef alltaf haft sterkar skoðanir á því hvernig samfélagi ég vilji búa í. Fyrstu Alþingiskosningarnar þar sem ég hafði kosningarétt voru árið 2013, ári eftir að ég öðlaðist ríkisborgarrétt. Það tók mig ekki langan tíma að hallast að Pírötum og eftir að hafa mætt á nokkra fundi stuttu eftir kosningar heillaðist ég af samskiptunum milli þingmanna og grasrótar. Þá ákvað ég að fara að taka virkan þátt í starfinu. Á aðalfundi Pírata árið 2014 var ég kjörin í framkvæmdaráð og síðasta haust var ég svo valin til að sitja í trúnaðarráði Pírata. Ég var einnig gjaldkeri Pírata í Reykjavík þar til á aðalfundi síðastliðin.

Eitt helsta baráttumál mitt er velferð barna, vernd þeirra og réttindi. Til dæmis að tryggja rétt barna til sambands við bæði foreldri sín eftir skilnað. Að börn með sérþarfir fái þann stuðning og meðferð sem þau þurfa. Þar vona ég að reynsla mín bæði sem leikskólakennari og sem fyrrverandi fósturbarn geti komið að gagni.

Einnig vil ég berjast fyrir réttindum fatlaðs fólks. Fötlun á ekki að koma í veg fyrir að fólk geti lifað lífinu eins og það kýs. Sá sem þarf á þjónustu að halda á að geta ráðið því sjálfur hvernig þeirri þjónustu er háttað. Einungis þannig er reisn þeirra sem þurfa að þiggja þjónustu tryggð. Enda veit hann best sjálfur hvað hann getur og hvað hann þarf.

Ég vil taka það fram að ég stefni á framboð í prófkjör í vor '18 og mun þess vegna taka sem minnst þátt í framkvæmd prófkjörs yrði ég kosin inn í stjórn PíR. Ég mun einnig segja mér úr stjórninni skyldi ég lenda ofarlega á lista að prófkjörinu loknu.