Sara Oskarsson (SaraOskarsson)

Ég er varaþingmaður Pírata. Ég tók sæti á Alþingi í mars 2017. Ég er einnig með B.A. (Hons) gráðu frá Edinborgarháskóla í myndlist. Ég er formaður Jæja.

Mig langar að byrja á að vísa í jómfrúarræðuna mína sem ég hélt í mars á þessu ári. Þar kemur margt fram sem brennur á mér! https://www.facebook.com/SaraOskarssonPiratar/videos/1877649192478573/

Ég heiti Sara Þórðardóttir Oskarsson og 36 ára. Ég á fjögur börn. Ég er með háskólagráðu frá Edinborgarháskóla þaðan sem ég útskrifaðist 2012 með B.A.(Hons) í myndlist. Ég er formaður Pírata á Seltjarnarnesi. Ég var meðstjórnandi Strandhöggs með Þórhildi Sunnu Ævarsdóttur þingmanni Pírata, sjónvarpsþáttar Pírata á Íslandi, frá upphafi þáttanna sem telja um 30 talsins. Ég er formaður Jæja sem hefur verið starfrækt síðan í nóvember 2014. Ég hef tekið þátt í skipulagningu fjölmargra mótmæla, sem hafa flest verið vel sótt. Ég var meðal þeirra sem skipulögðu, og hélt ræðu, á mótmælunum á Austurvelli þann 4. apríl 2016 í svokölluðu Panamamótmælunum. Þau voru stærstu mótmæli Íslandssögunnar, og talið er að um 30.þús manns hafi mætt niður á Austurvöll þann dag.

Ég starfaði í forsetaframboði Andra Snæs Magnasonar sem veitti mér gríðarmikla innsýn inn í álag og verklag slíkrar stjórnmálavinnu. Ég var einnig umboðsmaður forsetaframboðs Andra Snæs í Reykjavík norður.

Mín helstu áhersluatriði eru nýja stjórnarskráin og það að heilbrigðiskerfi Íslendinga verði sterkt og öllum aðgengilegt. Hitamálið hjá mér núna er að koma í gegn frumvarpinu sem ég samskrifaði um veip. Veip er bylting í tóbaksforvörnum og hefur alla burði til þess að bjarga óteljandi mannslífum á komandi áratugum fái hún að dafna og þróast. Birgitta Jónsdóttir flutti frumvarpið í heild í ræðutíma úr pontu í apríl sl. Frumvarpið um veip og er að finna hér: http://www.althingi.is/altext/146/s/0518.html

Hér er svo að finna flutning Birgittu Jónsdóttur þingmanns Pírata úr pontu (n.b. frumvarpið var ekki á dagskrá en Birgittu tókst að flytja það í ræðutíma): http://www.althingi.is/altext/upptokur/raeda/?raeda=rad20170425T163728

Einnig má finna upplýsingar um störf mín innan þingsins hér: http://www.althingi.is/leit/?q=sara+el%C3%ADsa+%C3%BE%C3%B3r%C3%B0ard%C3%B3ttir&thing=145&tilthing=147

Ég á auðvelt með að framkvæma hluti og á auðvelt með, og er þrælvön, að vinna með öðrum, jafnvel við erfiðar og álagsmiklar aðstæður og á auðvelt með að taka gagnrýni. Yrði ég kjörinn á þing myndi ég halda áfram að leggja mig fram af fullum hug og heilu hjarta við uppbyggingu lýðræðis, heilbrigðis og beinni þátttöku almennings í ákvörðunum er hann varðar.

Mikilvægt finnst mér einnig að þingmenn séu aðgengilegir fólkinu sem veitti þeim umboð, og myndi ég leggja mikla áherslu á það að gjáin milli þings og þjóðar verði að engu, og mér fyndist eðlilegast að fólki fyndist það geta nálgast þingmanninn sinn til þess td. að ræða málefni þingsins, eins og hvern annan einstakling í þjóðfélaginu.

Ég fékk brennandi áhuga á stjórnmálum eftir að hafa flutt aftur til Íslands árið 2012, og sá um leið að Píratar var flokkurinn fyrir mig, og að hann hafði fólk innanborðs sem hafði raunverulegan áhuga, og nógu sterka sannfæringu, til þess að geta breytt úrsérgengna, spillta og sérhagsmuna stjórnmálaumhverfinu sem er gegnsýrt af leyndarhyggju, sem að þjóðin hefur þurft að búa við í áratugi. Píratar hafa alla burði í að takast það sem að ekki nokkrum einasta flokki hefur tekist áður: að koma á raunverulegu, beinu og heilbrigðu lýðræði. Þar spilar traust stærsta hlutverkið - Píratar vilja að kjósendur treysti þeim og eru tilbúnir til þess að sýna það í verki.

Ég hlakka til að takast á við verkefnin hljóti ég umboð ykkar og heiti því að standa undir þeim af heilindum, trausti og í opnu samtali við félagsmenn og kjósendur.

Verið velkomin að kíkja á framboðssíðu mína á fésbókinni og líka við hana ef að þið viljið fylgjast með mér í kosningabaráttunni! https://www.facebook.com/SaraOskarssonPiratar/

Þakkir fyrir að lesa þetta til enda.
Baráttukveðjur,
Sara E. Þórðardóttir Oskarsson