Leigubifreiðar

Með vísan til:

Grunnstefnu Pírata

• §1 gr. 1: Píratar leggja áherslu á gagnrýna hugsun og vel upplýstar ákvarðanir.
• §2 gr. 1: Píratar beita sér fyrir eflingu og verndun borgararéttinda.

Stefnu Pírata um styttingu vinnutíma

• gr. 4: Að öðru leyti ber að endurskoða löggjöf þannig að sveigjanlegur vinnutími sé ekki óheppilegri kostur fyrir starfsmenn en fastur vinnutími, hvorki hvað varðar kjör né réttindi.

og með hliðsjón af:

• Lögum um leigubifreiðar
• Atvinnufrelsisákvæði stjórnarskrárinnar; 75. gr.
• Umsögn Samkeppniseftirlitsins
• Reglugerð um leigubifreiðar

álykta Píratar eftirfarandi:

1. Afnema skal takmörkun á fjölda leigubifreiða, þar sem slík takmörkun dregur úr samkeppni og atvinnufrelsi. Telji einhver að almannahagsmunir krefjist slíkra takmarkana skal færa haldgóð rök fyrir þeim.
2. Leyfa skal akstur leigubifreiðar sem hlutastarf. Seinni efnisgrein 7. gr. reglugerðar um leigubifreiðar skal falla brott.
3. Afnema skal skyldu leigubílstjóra til að vera á skrá hjá bifreiðastöð með starfsleyfi. Síðasta mgr. 5. gr. reglugerðar um leigubifreiðar skal falla brott.
4. Afnema skal lágmarksfjölda atvinnuleyfishafa hjá bifreiðastöð. B-liður og C-liður 23. gr. reglugerðar um leigubifreiðar skulu falla brott.
5. Að vera eigandi skráðrar leigubifreiðar skal ekki vera skilyrði fyrir því að fá leyfi til aksturs leigubifreiða.
6. Til að eiga skráða leigubifreið er ekki nauðsynlegt að hafa leyfi til að aka henni.
7. Viðskiptavinur skal upplýstur um þjónustuna og gjald sem henni fylgir áður en ákvörðun er tekin um að nýta hana.
8. Ekki skal leggja kvaðir á leigubílstjóra nema til þess að tryggja öryggi farþega. Séu slíkar kvaðir lagðar fram skal fylgja óyggjandi rök þess efnis að án þeirra sé farþegum stefnt í hættu.
9. Ofangreindar breytingar skulu koma til framkvæmda á 2-4 árum.