Samþykkt: Umboðsmenn Pírata
Sá texti sem hér fer a eftir verði 10. tölusetta lagagrein, eða kafli, laga Pírata í stað gr. "10. Aðildarfélög" og skal sú grein verða "11. Aðildarfélög". Tölusetningar aftari greina hækki um 1 hver.
10 UMBOÐSMENN PÍRATA
Píratar geta á almennum félagsfundum og Aðalfundi skipað umboðsmenn, einn eða fleiri, til að sinna ákveðnum, vel skilgreindum og tímabundnum verkefnum í umboði flokksins.
Verkefni umboðsmanna, skyldur þeirra til skýrslugjafar og tímamörk verkefnisins skal skilgreint í erindisbréfi sem lagt er fram á Aðalfundi flokksins eða almennum félagsfundi. Tímamörk verkefnis skal samsvara gildistima erindisbréfs.
Tímabinding skipunar skal vera eins þröng og kostur er og aldrei lengra en eitt ár. Hægt er að endurnýja erindisbréf þegar mest einn mánuður er eftir af gildistima fyrra erindisbréfs. Endurnýjun fer fram eins og um nýtt erindisbréf væri að ræða.
Framkvæmdaráð skal setja erindisbréf í rafrænt atkvæðagreiðslukerfi Pírata innan sólarhrings frá samþykkt félagsfundar eða Aðalfundar.
Erindisbréf öðlast gildi þegar það hefur verið staðfest á þrennan hátt. Fyrst með einföldum meirihluta í atkvæðagreiðslu meðal allra Pírata í rafrænu atkvæðagreiðslukerfi flokksins og svo af einföldum meirihluta aðalmanna í framkvæmdaráði og einföldum meirihluta þingflokks Pírata þegar slíkum flokki er til að dreifa.
Framkvæmdaráð og þingflokkur skulu greiða atkvæði um afdrif erindisbréfs innan 7 daga frá samþykkt erindisbréfs í rafrænni atkvæðagreiðslu. Láti framkvæmdaráð eða þingflokkur undir höfuð leggjast að greiða atkvæði um erindisbréf innan 7 daga frá samþykkt í rafrænni atkvæðagreiðslu skal það tákna samþykkt erindisbréfsins af þeirra hálfu.
Erindisbréf skal vera til umræðu í atkvæðagreiðslukerfi Pírata í sjö daga og atkvæðagreiðsla skal standa aðra sjö daga.
Fjöldi umboðsmanna verkefnis skal vera oddatala og skal hver umboðsmaður velja sér sinn varamann.
Umboðsmenn þurfa ekki að vera Píratar en geta verið sérfræðingar á því sviði sem verkefnið krefst eða eftir atvikum aðrir þeir sem sinnt geta verkinu.
Séu umboðsmenn verkefnis fleiri en einn skal þeirra fyrsta verk vera að skipta með sér verkum og kjósa sér fyrsta umboðsmann og einnig annan umboðsmann ef umboðsmenn eru fleiri en einn, úr sínum hópi.
Fyrsti umboðsmaður skal jafnan stýra fundum hópsins og sinna almennri verkstjórn hópsins en annar umboðsmaður skal rita fundi og taka við verkstjórn í forföllum fyrsta umboðsmanns.
Almennur félagsfundur eða Aðalfundur geta krafið umboðsmenn um skýrslu um stöðu verkefnis og skal henni skilað innan þriggja vikna frá þvi að hennar er krafist.
Hægt er að afturkalla erindisbréf umboðsmanna fyrir þau tímamörk sem bréfið kveður á um með sama hætti og þau eru búin til, sbr. 1. gr. og öðlast afturköllun gildi með sama hætti og erindisbréf, sbr. 5. gr.
| Tilheyrandi mál: | Umboðsmenn Pírata |
|---|
Útgáfur
| # | Staða | Höfundur | Lýsing |
|---|---|---|---|
| 1 | Samþykkt | mordur | Formáli Frumvarp þetta til lagabreytinga er efnislega byggt á frumvarpi um Stýrimenn sem hafnað var í atkvæðagreiðslu eftir góðar athugasemdir frá fundarmönnum á Aðalfundi Pírata 2016. Hér er að öllu leyti tekið tillit til þeirra athugasemda og eftirfarandi var lagað:
Greinargerð Píratarpartýið leggur megináherslu á beint lýðræði og hefur flokkurinn því flatan skipulagsstrúktur þvi í flokknum er megináhersla lögð á sjálfsstjórn og að að æðsta vald sé í höndum grasrótarinnar. Þvi hafa Píratar forðast að búa til föst embætti þar sem völd safnast fyrir. Þetta hefur leitt til ákveðinna vandamála sem helgast af umboðsskorti. Mjög illa hefur gengið að ganga verk sem vinna þarf þvi iðulega er óljóst hvort umboð er til verka og þá hver er handhafi þess umboðs. Þetta hefur leitt til þess að völd og verk hafa haft tilhneigingu til að lenda á framkvæmdaráði flokksins, sam aldrei var ætlað að sinna öðru en almennum reksri félagsins. Þetta hefur ennfremur leitt til þess að upp hafa komið hugmyndir um að hinn flati strúktúr flokksins sé lítt nothæfur í praxis og því þurfi Píratar að mynda innri strúktur sem byggir á stigskiptingu með formönnum, fastanefndum og öðrum valdhöfum. Fyrirsjáanlegt er, að ef Pírötum vex fiskur um hrygg og öðlast aukna lýðræðislega ábyrgð, muni enn rammar kveða að þeim vanda sem hér hefur verið lýst Í þessari viðbót við lög Pírata er lögð áhersla á að breyta ekki grunnstrúktúr flokksins. Föst, ótimabundin völd sem tengjast ákveðnum föstum embættum verða ekki til þvi allt umboð umboðsmanna er kyrfilega tímabundið og tengt skilgreindum verkefnum. Staða umboðsmanna færir Pírötum hins vegar lagalega undirstöðu undir veitingu og meðhöndlun umboðs í mikilvægum verkefnum þarf að vera hafið yfir vafa. Dæmi um verkefni sem fela má umboðsmönnum eru myndun rikisstjórnar, samningar við aðra stjórnmalaflokka, val á ráðherrum og öðrum embættismönnum fyrir flokkinn, samskipti við fjölmiðla við tilteknara aðstæður eða almennt o.s.frv. |